Bugungi kunda hamshiralik ishi ta’limini modernizatsiyalash sharoitida o‘rta maxsus tibbiy hamshira mutaxassislarini tayyorlashning kompetentlikka asoslangan modeli – tibbiy ta’limni innovatsion rivojlantirishning asosiy yo‘nalishi hisoblanadi.
O‘zbekiston Respublikasi Prezidentining 2017 yil 20 apreldagi PQ – 2909-son “Oliy ta’lim tizimini yanada rivojlantirish chora-tadbirlari to‘g‘risida” gi Qarorida belgilangan vazifalarning 1- band bo‘yicha belgilangan vazifalarda “har bir oliy ta’lim muassasasi jahonning yetakchi ilmiy-ta’lim muassasalari bilan yaqin hamkorlik aloqalari o‘rnatish, o‘quv jarayoniga xalqaro ta’lim standartlariga asoslangan ilg‘or pedagogik texnologiyalar, o‘quv dasturlari va o‘quv-uslubiy materiallarini keng joriy qilish“ kabilar ko‘rsatilgan. Bu borada Toshkent tibbiyot akademiyasida olib borilayotgan ilmiy-amaliy izlanishlar bilan bir qatorda xorij mamlakatlarining zamonaviy, ilg‘or texnologiyalarni o‘rganish ham muhim ahamiyatga ega. Buning uchun esa chet ellik yetuk mutaxassis professor o‘qituvchilar tomonidan ma’ruzalar, mahorat darslarni tashkil etish maqsadga muvofiq.
TTA allergologiya, klinik immunologiya va Hamshiralik ishi kafedrasi yetakchi professor-o‘qituvchilari xodimlari tibbiyot fanlari bo‘yicha falsafa doktori, katta o‘qituvchi Alikulova D. Ya oily hamshiralik ishi ta’lim yo‘nalishi bo‘yicha bir necha yillik tajribaga ega assistentlar Abdullayeva B. X., Mirpayziyeva M. A., Erkinov N.lar tomonidan “Hamshiralik ishi ta’lim yo‘nalishidagi klinik fanlarda amaliy mashg‘ulotlarga yangicha yondoshuv” mavzusida bir qancha tibbiyot texnikumlari o‘qituvchilariga o‘tkazilgan mahorat darsi hamshiralik ishi ta’limida hozirgi zamon muammolari va texnologiyalari haqida umumiy ma’lumot, «Talaba diqqat markazda» yangi pedagogik texnologiyadan foydalanishning turli jihatlari va metodlari, mualliflik usullari, ushbu texnologiyani amaliyotda qo‘llash bo’yicha yangicha metodik yondashuv bo‘la oldi.
Dolzarbligi: Respublikamizda Kadrlar tayyorlash milliy Dasturida ilg‘or texnologiyalarni keng rivojlantirish bilan uzluksiz ta’lim tuzilmasi va mazmunida tub o‘zgarishlar ko‘zda tutilgan. Bu vazifa fan, texnika va ilg‘or texnologiyalardan foydalanish asosida oliy ta’limdagi oliy hamshiralik ishi ta’limidagi o‘qitish va shaxsiy rivojlanishning maqsadlari, mazmuni, usullari, vositalarini tibbiy texnikumlarda qo‘llash orqali ilmiy qo‘llab-quvvatlashni talab etadi.
Mahorat (master klass) darsi – o‘qitish va tajriba almashishning interfaol shakli bo‘lib, u trening va anjuman formatini birlashtiradi. Hamshiralarning kasbiy darajani oshirish va dars o‘tish jarayonlarini olib borish haqidagi fikrlarini almashish maqsadida turli usullar va texnologiyalar bo‘yicha amaliy ko‘nikmalarni amaliyotga tatbiq etish uchun trening tashkil etildi. Trening yoki seminardan farqli ravishda, mahorat darsida kelajakda hamshira mutaxassislarning kasbiy malakasini yanada boyitish uchun urg‘u berildi. Qolaversa tibbiyot texnikumlarida faoliyat ko‘rsatayotgan mutaxassis o‘qituvchilar nazorati ostida talaba o‘quvchilarni hamshiralik ishiga oid malakani egallash bo‘yicha faol ishlarga jalb etildi. Hamda mahorat darsida uchta asosiy tamoyil «Talaba diqqat markazda» pedagogik tajribani taqdim etildi. Taqdim etilgan ushbu ta’lim texnologiyasining asosiy g‘oyalari keng tavsiflandi va aniq namunasi mashg‘ulot shaklida ko‘rsatildi, so‘ng talaba o‘qituvchi faoliyatidagi muammolar va istiqbollar tinglovchilar bilan muhokama qilindi.
Xulosa: shunday qilib, hamshiralik ishi ta’lim yo‘nalishining klinik fanlaridagi amaliy mashg’ulotlarida «Talaba diqqat markazda» pedagogik texnologiyani tadbiq etib, amaliy ko’nikmalarni dars jarayonida qo‘llash orqali talaba – o’quvchilarning faol ishtirokini rag’batlantirish, nazariy bilimlarini amalda ishlatish va o’zlashtirishlarini rivojlantirishga yordam beradi. Bu usul nafaqat talaba – o’quvchilarning balki tibbiyot texnikumlarining o‘qituvchilarini ham o’z ustida ishlashini mustahkamlaydi, o’rganish jarayonidagi motivatsiyalarini rivojlantiradi hamda amaliy mashg’ulotlar va ko’nikmalarni o’zlashtirishlarida tajribasini oshirish imkonini beradi.
